اليفارك حبيبة كلشي يتحمل

وحدي ..ابلا صديق او لا حبيب
فد صوت النفس من يصعد وينزل
وفد ذكرياتك هنة كلشي وياي
احاجيهن وبيهن اكعد اتغزل
واتذكر زعلنة وبينا طب افراك
وكفت اكبال روحي كمت اترزل
انة مراية صرت كدام نفسي اكشخ
عزت نفسي ماتسمحلي اتوسل
ودرج باياتة تنزل بينا للسرداب
بس انطيتها ضهري وكمت انزل
خمس سنين ردت انساك
كل يوم بغيابك جنة يوم اول
وحاجيك بحلم مجنون يتذكر
يفز ويدورك ويفشل
ويكتب اسمك بجتفة ويضل يحفر
واذا سألوني عنك اسكت واخجل
فشلة الوحدي يشوفوك مو وياي
شجاوبهم شكلهم راح وتبدل؟
ضيعتة وتهت ماوجدت ممشاه
لو اعمى صرت والبيتة مااندل
لكيت احسن طريق ابتعد عن الناس
اليفارك حبيبة كلشي يتحمل

عامر العراقي


تم النشر سابقاا